Filimi ya JESU

O ka be o šetše o bone difilimi tše dintši, eupša filimi ya JESU ga e swane le tše dingwe. Ke filimi ye e bontšhago bophelo bja Kriste thwii, gomme e fetola maphelo a batho.

JESU Ga go filimi ye nngwe ye e ilego ya fetolelwa le go bontšhwa gakalo mo historing. Se se dirago gore filimi ye e goke le go hudua meoya ya batho, ka bonnete le botlalo bja yona.

Go kgethilwe Ebangedi ya Luka mo Bibeleng, gomme ya ba motheo wa poledišano le ditiragalo mo filiming. Go tšere nywaga ye mehlano go nyakišiša le go lokiša mabaka pele filimi e thoma go tšewa kua Israele. Go ile gwa elwa hloko maele a dirutegi tša akhiolotši, histori le thutatumelo, gomme gwa rokwa diaparo tša go swana le tše di bego di aparwa ka nako ya Jesu, gomme gwa dirwa didirišwa le dibjana gore le tšona di swane le tša nako yeo.

“Re be re kganyoga go ka tšweletša tiragatšo ya nnete ka monna wa nnete yo a bego a phela nywaga ye 2 000 ye e fetilego,” gwa rialo Paul Eshleman, morulaganyi wa phatlalatšo ya filimi ya JESU lefaseng ka bophara. “Jesu o be a šoma ka diatla, a phela le batho ba nnete, a eja dijo tša bona, a tseba la mahlomola a bona. Re lekile go tšweletša filimi ye e tlogo kaonafatša tlhaologanyo ya babogedi ka monna yo, yo a fetotšego tebanyo ya histori, a bilego a fetola maphelo a batho le bjale, yena yo e bego e le Modimo le monna ka nako e tee, yena Jesu wa Natsaretha.

Gore babapadi ba tiragatšo ye ya Jesu ba kgethwe ka tebanyo, go be go swanetše go dirwe dinyakišišo tše di tiilego, gagolo malebana le kgetho ya mmapadi yo a bego a tlo bapala karolo ya Jesu. Gore difahlogo e be tše di holofetšago, babapadi ba 45 gotee le babapaditlaleletši ba 5 0000 ba kgethilwe bathong ba ba phelago gona kua Bohlabelagare. Eupša, karolo ya mmapadithwadi yo a bapalago karolo ya Jesu, yona e filwe Brian Deacon wa Royal Shakespeare Company ye e tumilego kudu kua Engelane. Deacon o kgethilwe gare ga babapadi ba 1 000 ka baka la bokgoni le boikokobetšo bjoo a bego a bo laetša ge a bapala kanegelo ya Jesu go ya ka fao Luka a e laodišago ka gona.

Go fihlela lehono, filimi ya JESU e fetoletšwe ka dipolelo tše di fetago 650. E šetše e bogilwe ke batho ba ba fetago 4 bilione lefaseng ka bophara. Tšhelete ya go dira filimi ye e be e etšwa go  Campus Crusade for Christ International. Morulaganyi wa filimi e be e le John Heyman, e lego mothopi wa sefoka mo phadišanong ya difilimi ya Canes. Warner Brothers e be e laola phatlalatšo ya filimi mo dipaesekopong tša Amerika Leboa.